Mikil ánægja með Bryggjudaga á Súðavík og hljómsveitina Spútnik.

"Bryggjudagar voru haldnir í fjórða sinn um helgina og heppnuðust þeir vel að sögn Guðnýjar Hönnu Harðardóttur framkvæmdastjóra hátíðarinnar. „Ég var mjög ánægð með hvernig til tókst og þátttökuna í öllu nema tónleikunum og ballinu. Fólk missti af miklu því að dúettinn Hundur í óskilum var frábær og hljómsveitin Spútnik var ekki síðri en Paparnir.“ Meðal þess sem boðið var upp á söngkeppni yngri kynslóðarinnar „Sædol Súðavíkur“, sigling að fiskeldiskvíum í Álftafirði og dorgveiðikeppni á bryggjunni. Þá var einnig boðið til grillveislu í Raggagarði, fjölskyldugöngu að Valagili. „Dorgveiðikeppni var frábær, mikið stuð á Sædolinu og í grillveislunni og 30 manns tóku þátt í göngunni. Við fengum mjög gott veður og allt tókst frábærlega svo að allir voru ánægðir að hátíð lokinni“, segir Guðný Hanna. Þess má geta að Súðavíkurhreppur og Starfsmannafélag Hraðfrystihússins-Gunnvarar hf. í Súðavík voru frumkvöðlar að hátíðinni þegar hún var fyrst haldin árið 2003".

Grein úr Bæjarins besta. Vefslóð: http://www.bb.is/?PageID=178&NewsID=71547